Xəyalə Məşədiyeva – Haqqımda

 

Mən, Xəyalə Məşədiyeva, “Woundcare Global” layihəsinin təsisçisi və CEO-su, eyni zamanda Global Medical MMC-nin qurucusu və direktoru olaraq, həyatımı yara baxımı və müasir müalicə metodlarının inkişafına həsr etmişəm.

 

Peşəkar Yolum

 

1995-ci ildə Sumqayıt Tibb Texnikumuna qəbul olaraq, 1998-ci ildən etibarən uzun illər Ruhi-Əsəb Dispanserində tibb bacısı kimi fəaliyyət göstərdim. Xəstələrlə yaxından işləmək, onların gündəlik həyatına dəstək olmaq, mənim üçün sadəcə peşə deyil, insanlıq borcu oldu.

 

Sonrakı illərdə Türkiyədə və Azərbaycanda çoxsaylı kurs və təlimlərdə iştirak etdim. 2011-ci ildə Ankara Universiteti Tibb Fakültəsi İbn-i Sina Xəstəxanasında ixtisasartırma kursunu tamamladım, müxtəlif özəl xəstəxanalarda praktiki təcrübələr qazandım. 2012-ci ildən etibarən isə Sumqayıtda “Real-Med” və daha sonra “Unikal” klinikalarında çalışaraq yüzlərlə diabetik ayaq yarası və yataq yarası olan pasiyentin müalicəsində iştirak etdim. Multidisiplinar yanaşma ilə amputasiyaların qarşısını aldıq və yüzlərlə insanın həyat keyfiyyətini yüksəltdik.

 

Yara Forumları – Azərbaycanda İlk

 

Mənim fəaliyyətim yalnız klinik müalicə ilə məhdudlaşmadı. 2020-ci ildə Azərbaycanda ilk dəfə “Yara Forumu”nu təşkil etdim. Bu forumda Türkiyədən dəvət olunmuş hörmətli professorlar və yerli mütəxəssislər bir araya gələrək, həkimlərə və tibb bacılarına yara baxımı sahəsində ən son bilikləri təqdim etdilər.

 

2025-ci ildə isə 2-ci Yara Forumunu daha geniş miqyasda həyata keçirdim. Bu dəfə də yüzlərlə həkim və orta tibb işçisi iştirak etdi, Türkiyənin və Azərbaycanın tanınmış mütəxəssisləri tərəfindən yüksək səviyyəli elmi təqdimatlar və praktiki təlimlər keçirildi. Mənim üçün bu tədbirlər təkcə konfrans deyil, Azərbaycanda yara baxımı sahəsində yeni səhifənin başlanğıcı oldu.

 

Woundcare Global və Beynəlxalq Əməkdaşlıqlar

 

Hazırda Woundcare Global çərçivəsində Azərbaycanda və Türkiyədə:

 

yara baxımı üzrə xidmətlər göstəririk,

 

sarğı vasitələrinin satışı, istifadəsi və tətbiqi ilə məşğuluq,

 

peşəkar təlimlər və seminarlar təşkil edirik.

 

 

Şirkətimizdə Türkiyənin məşhur yara koordinatoru çalışır və biz birlikdə bir çox özəl klinikalara yara danışmanlığı (wound consultancy) xidmətləri göstəririk. Bu əməkdaşlıq sayəsində Woundcare Global təkcə Azərbaycanda deyil, regionda da peşəkar yara baxımı sahəsində etibarlı bir marka kimi tanınmaqdadır.

 

Yara Baxımında Missiya

 

Mənim əsas prinsipim budur:

“Sağalmaz yara yoxdur, gec qalmış xəstə vardır.”

 

Yara baxımı yalnız tibbi prosedur deyil – bu, həm də insana həyat şansı bəxş edən bir missiyadır. Dünyada tətbiq olunan ən son təcrübələri ölkəmizdə yaymaq, həkimləri və tibb bacılarını maarifləndirmək və hər bir xəstəyə ümid vermək mənim əsas məqsədimdir.